4 нче көн #әдәбимарафон2025
Зөлфәт ХӘКИМ. Җир әсире. Повесть Теге качкын егет Галиянең уеннан чыкмады. Ашап-эчеп, сөйләшеп утырганнан соң, күршеләр өйләренә таралдылар. Качкынга ашарга илтеп кайтырга бернинди мөмкинлек юк. Землянка моннан шактый ерак. Төнге унбердә анда барып кайтырга нинди сәбәп тапмак кирәң?.. Галия, бик нык аруына карамастан, йокыга китә алмады Нишләмәкче була соң бу егет иреккә чыгып?.. Ирекмени бу?!. Ул бит хәзер дә тоткын, әсир. Урман тоткыны, тынчу землянка әсире. Сөйгән кызымны көчләделәр ди... Бу уйдан Галиянең тәне эсселе-суыклы булып китте, бер мизгел эчендә теге коточкыч вакыйга бер чигәдән икенчесенә ток сыман чыңлап үтте. Алга таба ничек яшәргә уйлый икән бу егет?.. Әти-әнисе, туганнары бар микән?.. Аның җәберләүгә дучар булган кызы кайларда икән? Ә-ә-ә... Ул егет бәлки сөйгән ярын күрер өчен качкандыр! Мөгаен, шулайдыр. Ул кыз, бичара, бик кайгыдадыр инде, егетен сагынадыр, елый-елый язмышын Каргыйдыр! Аны зарыгып, сагынып көтәдер. Тизрәк таң атсын иде инде. Качкынга ярдәм итәргә кирәк. Бәлки сөеклесе белән очраштырырга да мөмкин булыр. Шушында, урманда! Туктале, ә ул егет көчләнгәннән соң аны ярата микән?.. Башкалар кагылгач, аның мәхәббәт хисләре сүрелмәгәнме?.. Юктыр! Сөйгән ярын рәнҗеткән кешеләрдән үч алырлык, мәхәббәт бакчасы башкалар тарафыннан тапталу белән килешә алмый торган кеше булгач, һаман да яратадыр. Ул бит җинаятьчегә дә охшамаган. Шул киеме дә, такыр башы гына сәер инде... Йоклый микән ул хәзер... Тәмәке тартасы бик киләдер инде. Аннан соң уйлар Галияне Казанга алып китте: институт, студентлар тормышы, буш кибетләр, группировкалар, моталыциклар, пычрак урамнар, явыз кешеләр, митинглар, тулай торак... Тулай торактагы теге вакыйгага килеп җиткәч, тагын качкын егет турындагы уйларга әйләнеп кайтты. Авыр уйлар бер-бер артлы баш миенә керә-чыга йөдәтсәләр дә, юлдан талчыгып кайту үзенекен итте. Табигатьнең иң бөек бүләкләреннән берсе булган йокы Галияне, кыска гына вакытка булса да, бертуктаусыз җанны борчып торган уйлардан үзе белән алып китте.
593
0