#Әдәбимарафон Шәмсия Җиһангирова
2 нче көн. #Әдәбимарафон Шәмсия Җиһангирова Азан ишетелми, чаң да сукмый Торган болганчык бер заманда, Тау кадәрле күчтәнәчләр төяп, Әнкәй килгән иде Казанга. Автобустан аны каршы алдык. Әйберләрен көчкә күтәреп, Өйгә кайтып кергәнебез истә... Бик күп мәлләр, хәлләр истә юк. Ни сөйләшкән, ниләр пешергәннәр... Хәтеремдә түгел берсе дә. Тик бер сүзе җанга уелып калды: Сискәндерә исемә төшүгә. Өйгә кайткач, чәйләр эчеп алгач, Чыкты да ул тәһарәтләнеп: «Кыйбла кайда? – диеп сорап куйды. – Беләсеңме кайда икәнен?!» Мин аптырап калдым. Белми идем: Кайда мәшрикъ, кайда мәгърип... Бергә фикерләшеп, карар кылдык: «Кыйбла шул тарафта булыр...» дип. Кыйбла мәсьәләсе хәл ителгәч, Озак итеп, намаз укыды. «Кыйблаң кайдалыгын белмәгәч... – дип, Үзалдына сөйләп утырды. – Син бит андый түгел идең, балам, Менә ышан син бу яшьләргә... Кыйблаңны да белми, бу дөньяда Нинди максат белән яшәргә?..» Оят иде миңа. Җир тишегенә Керер булдым, әгәр ярылса. ...Ярый ла ул әнкәң исән чакта Тоткан кыйблаң дөрес табылса. #Шәмсия Җиһангирова #әдәбимарафон2024 #ТатарстанЯзучыларБерлеге #ТатнетныҮстерүФонды #БелемРадиосы #АОТатмедиа #Таттелеком #44
414
0