Күңелдә якты уйлар

Хөрмәтле язылучылар, кичә 21 көн дәвам иткән Дөньякүләм буйлап узучы XXVII Әдәби марафонны тәмамладык. Мин 21 көн буена Гүзәл Галләмова язган Ялгыз көймә повестен укыдым. Гүзәл Галләмова бу әсәрендә китапка мәхәббәт уяткан олы җанлы өлкән буын китапханәчеләрен яктырта. Әдәби әсәрнең төп герое - китапханәче кыз - чит авылга килеп, ачы язмышка дучар була : хыянәттә сынала, зур кайгы-хәсрәтләр кичерә. Шулай да ихлас күңелле Саимә язмыш сынауларына күркәм холкы белән җавап бирә, вөҗданына хыянәт итми, үзе булып кала һәм авыл халкының хөрмәтен яулый,гомер көзенә кергәндә, олы мәхәббәтен таба. Рәхмәт Гузель Галлямова эчтәлекле, күңелләрне айкый торган әсәр иҗат итүегезгә. Мин Әдәби марафонның проект җитәкчесе Раил Гатауллин га да тирән рәхмәтемне җиткерәм. Кызу язгы эш вакытында вакытны бүлеп китап укырга "мәҗбүр" иткәне өчен. Эшләрегез гел уң барсын. Әйе, дусларым китап уку бары яктылыкка гына илтә. Марафон сезгә нәрсә бирә диючеләр күп. Әдәби марафон миңа рухи азык бирә, 21 көн китап укып аны көн дә челтәр битенә кую - төгәллек сорый, марафонда катнашып күпме дуслар таптым, татар теленең нинди бай икәнен күрдем, онытыла башлаган сүзләр язылышын искә төшердем. Китап укудан алган тәэсирләрем күңел түре дәфтәрендә сакланыр дип уйлыйм.