21 нче көн Динә Латыйпова “Бөкре мәхәббәте”

Ләйлә киткәч, табынның яме бетте. Элек тә шулай иде. Ләйлә булган җирдә күңелле, рәхәт. Ул һәркемнең күңелен күрә белә. Әллә нинди кызык хәлләр, маҗаралар уйлап чыгара. Ярышлар, уеннар оештыра. Бүген менә башкача. Хәтта Ләйлә табында булганда да аның кәефе юклыгы, күпме сиздермәскә тырышса да, халәтендә чагылды. Айрат белән очрашуларыннан йөрәк телгәләнде. Сөйгән ярыңны башкалар куенында күрү – моны үз башыннан кичергәннәр генә аңлыйдыр. Ник шулай икән мәхәббәт дигәннәре? Үзе баллы, үзе әче. Әче булыр, сөйгәнеңне башкалар алсын әле. Әнә бит Айратның хатыны ничек бәхетле. Айрат үзе бәхетле була алырмы икән Ләйләдән башка? Алар бит, Таһир-Зөһрә кебек, бер-берсе өчен яратылган парлар иде. Айрат дип, Ләйлә утка да, суга да керергә әзер булды. Тик егет кенә әллә нишләде. Кем белә инде, әнисе алдырмаган, диләр. Фәнсаф әйтмешли, йолкышны ефәк иткәч, шулай була инде. Айрат балтасы суга төшкән останы хәтерләтте. Үзе уңган да, үзе булган да, әмма коралсыз берни эшли алмый. Бер мескенгә әйләнә. Айрат та нәкъ шундый хәлдә. Үзе яшь кияү, бөтен игътибар аларда, ләкин Ләйлә кайтып киткәч, барлыкларын да белүче булмады кебек. Шулай да кызлар, Ританың уңайсыз хәлдә калганын аңлап, юктан бар булсын дигәндәй, сораштырып утырдылар.

Тэглар:

Сылтамалар: