2 нче көн Динә Латыйпова “Бөкре мәхәббәте”
2 нче көн Шулчак халык төркеме арасыннан бер апаның аларга таба атлаганы күренде. Шундый матур апа. Өстендәге күлмәге башка елларда Җандуска биргән бизәкле сөлгене хәтерләтә. Башында – ак яулык. Иңендәге ефәк шәлен кулына тоткан. Үзе соңга калмагаем дигәндәй, бер атлый, бер чаба. Апа кулындагы җилфердәп килгән челтәр шәлен Җандусның муенына бәйләде һәм, атның иягеннән алып, үзенең җилкәсенә куеп, сөеп-иркәләп алды. Аннан соң апа горур атлап кунак чит җайдакның каршысына килде дә кинәт кулындагы затлы чыбыркысын тартып алды. Шулчак, беркем өчен дә көтелмәгән хәрәкәт белән, бизәкле сырлар төшерелгән чыбыркы сабын тезенә китерде дә, шарт иттереп, икегә сындырды. Мәйдан яңадан гөр килде. - Сезгә кул күтәрергә кем рөхсәт итте? Ни хакыгыз бар? Кем сез? Кем чакырды? Сабан туе ул – авыл атларының бәйрәме! Кырларда, басуларда иген иккән, җир сөргән, сабан тарткан, хезмәт куйган халык һәм атлар бәйрәме! Үз яланыңа килеп, һәр оттыручы авылдашларыңны кыйнап китә башласа? Оттырдың икән, килешә бел! Ничего монда килеп әтәчләнеп йөрергә. Шәһәреңдә чап! Болай булса, авылның да, милләтнең дә йөзек кашы булган бәйрәмебез юкка чыгачак.
Сылтамалар:
119
0