Кызыл гөл
Мәдинә Маликова "Кызыл гөл" ... Төнге сменага калган биш слесарьны иртән ачык склад идәнендә тәгәрәшеп яткан хәлендә таптылар. Икесе җан тәслим кылган , өчесе һушсыз иде. Яннарында аунаган калай савытларны һәм тоздан бушаган кәгазь капларны күрүгә, фаҗиганең сәбәбе аңлашылды: "БФ-88" дигән җилемне эчкәннәр болар. Элек тә ишетелгәли, сизелгәли иде: сәрхүшләр кул астында бернинди хәмер дә, хәтта техник спирт та булмаган очрактада җилемгә тотыналар, дип. Аңа башта су, аннары тоз салып озак кына болгаталар да сөзәләр... Ләкин моңарчы үлгән кеше юк иде әле. Ә менә бу юлы эш зурга китте. Шау-шу, ыгы-зыгы купты. Бичараларны "ашыгыч ярдәм" машинасына салып озатуга, төрле оешмалардан вәкилләр килеп җитте... Тотындылар гаеплене эзләргә. Иң беренче итеп, Мортазаның якана килеп ябыштылар, билгеле. "Хезмәт куркынычсызлыгы буенча инженер ни караган?" Шундук завод лабораториясенә берничә банка җилем белән берничә кап тоз кертеп бирделәр, әлеге тинтәк слесарьлар кыланганны кабатлап эшләргә боердылар. Ак халатлы яшь кызлар тегесен-монысын кушалар, болгаталар, селкиләр. Ә үзләренең күзләре тасырайган, борыннары җыерылган... Шундый да зәһәр сыекча хасил булган ки, аны эчкән бәндәләрнең бөтен гәүдәләре ничек кара кисәүгә әйләнмәгәндер! 40 нчы бит
92
0