8 нче көн Динә Латыйпова “Бөкре мәхәббәте”
Ләйләнең әнисе Гөлсирә авылда иң матур кыз иде. Кара чәчле, шомырт кара күзле. Сыгылып торган зифа буй. Тал чыбыгыдай нечкә бил. Өстәвенә бик акыллы һәм уңган. Аның кычкырып сөйләгәнен дә хәтерләмиләрдер. Әнисенә охшаган, диләр иде. Гөлсирә, мәктәпне бетергәч фермага сыер саварга килде. Беренчедән, өлгергәнлек аттестаты алучы һәркем алдында бурыч куелган. Бер ел авылда эшләргә! Дөрес, Гөлсирә болай да шәһәргә китәргә ашкынып тормады. Авылда әнисен калдырасы килмәде. Әнә Рәхимҗан да авылда гына калды. Кызга гел төрттереп әйтеп куя. “Гөлсирә, мин сине беркая да җибәрмим. Яучыдан кулыңны соратам, ризалашмасаң урлыйм. Туйлар гөрләтербез, авылда калабыз”, - ди. Әмма үзе клубта биергә дә чакырмый. Әй, биегәне дә юк бугай аның. Клубтан ияреп кайта, капка төбенә җиткәч, Гөлсирә саубуллашып кереп киткәнче басып тора да өенә сыпырта. Үзе һаман мәктәптән бирле гел янда бутала. Беркөнне шулай кызлар клубка чыккач, күз явын алырлык егет килеп керде. Председатель малае. Шәһәрдән кайткан. Клубтан соң ул Гөлсирәләр төркеменә иярде. Иярде дә капка төбенә җитәрәк кызның каршына басып юлын кисте. Нишлисең, председатель малаеның да сүз әтисенеке кебек закон. Кыз басып калды. Рәхимҗан китеп барды.
Сылтамалар:
122
0